Nazirin Brüssel müzakirələri
Azərbaycanın müdafiə naziri Zakir Həsənov iyunun 29-u Brüsseldə Şimali Atlantika Şurasının Əfqanıstan İslam Respublikasındakı Qətiyyətli Dəstək Missiyası formatında keçirilən görüşdə iştirak edib. Toplantıda Əfqanıstandakı təhlükəsizlik vəziyyəti, Qətiyyətli Dəstək Missiyasının gələcəyi, Əfqanıstan müdafiə və təhlükəsizlik qüvvələrinin inkişafı üzrə müzakirələr aparılıb.
Hazırda Azərbaycan Silahlı Qüvvələrinin 94 nəfərlik sülhməramlısı Əfqanıstanda həyata keçirilən Qətiyyətli Dəstək Missiyasında iştirak edir.
Mod.gov.az-ın məlumatına görə, Zakir Həsənov səfər çərçivəsində NATO baş katibinin müavini Rouz Gotemollerlə görüşüb. Tərəflər Azərbaycan-NATO münasibətləri, müdafiə sahəsində alyansla qarşılıqlı faydalı əməkdaşlıq və Azərbaycanın Qətiyyətli Dəstək Missiyasına verdiyi töhfə ətrafında fikir mübadiləsi aparıblar. Müdafiə naziri Ermənistan-Azərbaycan Dağlıq Qarabağ münaqişəsi barədə məlumat verib.
Zakir Həsənov Türkiyə Respublikasının milli müdafiə naziri Fikri İşıq, Makedoniya Respublikasının müdafiə naziri Radmila Şekerinska ilə də bir araya gəlib.
