Narkomaniya rəqəmləri
2016-cı ilin sonuna Azərbaycanda 29 min 448 nəfər narkoman qeydiyyata düşüb. Novator.az-ın məlumatına görə, Səhiyyə Nazirliyi bəyan edib ki, opioidlərin qəbulu üzrə 20 min 576, kannabioidlərin qəbulu üzrə 8 min 872 nəfər qeydiyyata alınıb. Respublika Narkoloji Mərkəzində 24 min 56 nəfər, profilaktik qeydiyyatda isə 5 min 392 nəfər olub.
Qeydiyyatda olan narkomanların 612 nəfərinin qadınlar, toksikomanların ümumi sayının 183 nəfər olduğu bildirilir.
2016-cı ildə dispanser qeydiyyatında 1567, profilaktik 575 nəfər olmaqla 2 min 142 narkoman qeydiyyata götürülüb, 1249 nəfər isə qeydiyyatdan çıxarılıb.
Ölkədə 459-u qadın olmaqla 20 min 576 inyeksion narkotik istifadəçisi var.
2017-ci ilin 6 ayı ərzində Respublika Narkoloji Mərkəzində məhkəmə-narkoloji tibbi yoxlamadan 1089 nəfər keçib. Onlardan 657-nə məcburi müalicə təyin olunub. Ümumilikdə 6 ay ərzində mərkəzdə 1650 nəfər müalicə alıb. Onlardan 613-ü alkoqol qəbulu nəticəsində psixi və davranış pozuntuları (F10), 1028-i opioidlərin qəbulu nəticəsində psixi və davranış pozuntuları (F11), 9-u isə digər diaqnozlarla müalicəyə qəbul edilib.
