İŞİD ərazi və pul itirir
“İHS Markit” təhlil şirkəti İŞİD terror təşkilatı ilə bağlı hesabat yayıb. Novator.az-ın məlumatına görə, hesabatda qeyd olunur ki, üç il əvvəl qurulmuş İŞİD hazırda ərazilərin 60%-ni, gəlirlərinin isə 80%-ni itirib.
İŞİD terror təşkilatı 2014-cü il iyunun 29-da Əbubəkr əl-Bağdadinin başçılığı ilə özünü xəlifə elan edib.
“İHS Markit”in hesabatına əsasən, 2017-ci il iyunun 26-na qədər İŞİD 36 min 200 kvadrat kilometr əraziyə nəzarət edib (Belçikanın ərazisi qədər). Bu, ilin əvvəlindən İŞİD-in nəzarətində olan əraziyə nisbətən 40%, 2015-ci ilin əvvəli ilə müqayisədə isə 60% az ərazi deməkdir. İŞİD-in əlində həmin vaxt Suriya və İraqda 90,8 min kvadrat kilometr ərazi olub.
Məruzədə qeyd olunur ki, İŞİD-in 2015-ci ildə əldə etdiyi 81 milyon dollarlıq gəlir 2017-ci ilin ikinci rübündə 16 milyon dollara qədər azalıb. Bu azalma neft hasilatı və satışından, yüksək vergi və müsadirədən gələn gəlir kanallarının məhdudlaşması ilə bağlıdır. Neftdən gəlirin 88% azaldığı vurğulanır.
Səidə Hüseynova
