Rahim Hacıyev Fransadadır
Bu il yanvarın 5-də “Azadlıq” qəzetinin baş redaktorunun birinci müavini Rahim Hacıyev Fransaya səfər edib, amma oradan qayıtmayıb.
İyunun 26-da Bakipost.az Rahim Hacıyevin Hollandiyadan sığınacaq istədiyini, ancaq yerli məhkəmədən müsbət cavab ala bilmədiyini xəbər verib.
“Azadlıq” qəzetinin redaktoru, Rahim Hacıyevin qardaşı Rövşən Hacıbəyli iyunun 29-da Novator.az-a bildirib ki, məhkəmənin imtina qərarı Avropa İttifaqında qüvvədə olan miqrasiya qaydaları ilə bağlıdır: “Qaydalara görə, şəxs yalnız Avropaya daxil olduğu ölkədən siyasi sığınacaq istəyə bilər. Rahimin Hollandiyadan deportasiya olunduğu barədə xəbərlər doğru deyil. Hollandiyalı rəsmilər Fransa ilə əlaqə saxlayıb Rahimi qəbul edib-etmədiklərini soruşublar. Cavab müsbət olduğundan Rahimə bilet alınıb və o, Parisə göndərilib. Hazırda Rahim Fransadadır”.
Rahim Hacıyev 2011-ci ildə baş redaktor Qənimət Zahid Fransaya köçəndən sonra “Azadlıq” qəzetinə rəhbərlik edib.
2016-cı il avqustun 20-də qəzetin maliyyə direktoru Faiq Əmirli həbs edilib. Bu həbsdən sonra “Azadlıq”ın bank əməliyyatı aparması mümkün olmayıb, 2016-cı il sentyabrın 5-də qəzetin çapı dayanıb.
