Bayram Məmmədov aclıq aksiyasını dayandırıb
Məhbus fəal Bayram Məmmədov aclıq aksiyasını dayandırıb. İyunun 29-da Novator.az-a danışan vəkil Elçin Sadıqov deyib ki, cəzaçəkmə müəssisəsinin rəisi Bayram Məmmədova tələblərinin təmin olunacağına söz verib.
Penitensiar Xidmətin 13 saylı Cəzaçəkmə Müəssisəsində saxlanan Bayram Məmmədov iyunun 23-də şəraitinin ağırlığına etiraz olaraq aclıq aksiyasına başlamışdı. Vəkilin sözlərinə görə, məhbusun saxlandığı yer onun səhhəti üçün ciddi problemlər yaradır.
Bayram Məmmədov digər gənc fəal Qiyas İbrahimovla birgə 2016-cı il mayın 10-da həbs edilib. Gənclər külli miqdarda narkotik vasitə saxlamaqda təqsirli biliniblər. Bakı Ağır Cinayətlər Məhkəməsi onları 10 il müddətinə azadlıqdan məhrum edib.
Müdafiəçiləri hər iki gəncin siyasi sifarişlə tutulduğunu iddia edirlər. Bildirilir ki, mayın 10-na gecə Bakının mərkəzində Heydər Əliyevin abidəsinin üzərində etiraz şüarları yazılıb, gənclər bu şüarlara görə tutulub.
