AŞPA sədrini istefaya göndərirlər
İyunun 27-si Avropa Şurası Parlament Assambleyasının (AŞPA) Strasburqda keçirilən plenar iclasında “Parlament Assambleyasında məsuliyyət prinsipinin tanınması və həyata keçirilməsi” adlı hesabat qəbul olunub. APA-nın məlumatına görə, hesabat AŞPA prezidentinin, vitse-prezidentlərin və komitə sədrlərinin vəzifələrindən çıxarıla bilməsi məqsədilə qurumun daxili prosedurunda dəyişikliyi nəzərdə tutur. Sənədin lehinə 154 nəfər, əleyhinə 30 nəfər səs verib, 13 nəfər bitərəf qalıb. Bu hesabatın qəbulundan sonra AŞPA-nın sədri (prezidenti) Pedro Aqramuntun vəzifədən uzaqlaşdırılacağı gözlənir.
Yaz sessiyasında Pedro Aqramuntun istefası tələb olunub. Buna Pedro Aqramuntun Suriyaya səfəri səbəb göstərilib.
Pedro Aqramunt Suriyaya bu ilin martında Rusiya Dövlət Dumasının sədr müavini Vladimir Vasilyevin rəhbərlik etdiyi nümayəndə heyəti ilə birlikdə səfər edərək görüşlər keçirib, o cümlədən Suriya prezidenti Bəşər Əsədlə bir araya gəlib.
Novator.az bildirir ki, Pedro Aqramunt 1951-ci ildə Valensiyada anadan olub. Hüquqşünasdır. İspaniya parlamentinə ilk dəfə 1991-ci ildə seçilib. 2000-ci ildən Avropa Şurası Parlament Assambleyasının üzvüdür. 2010-2015-ci illərdə Avropa Şurasının Azərbaycan üzrə məruzəçilərindən biri olub.
Avropa Xalq Partiyasının nümayəndəsi olan Pedro Aqramunt ötən ildən Avropa Şurası Parlament Assambleyasının sədridir.
Suriyada 2011-ci ilin mart ayında Əsəd sülaləsinin hakimiyyətdən getməsi tələbi ilə başlayan xalq hərəkatı sonradan vətəndaş müharibəsinə çevrilib. 2000-ci ildən ölkədə prezident postunu Bəşər Əsəd tutur. 1971-2000-ci illər arasında isə Suriyaya onun atası Hafiz Əsəd prezidentlik edib.
