Bu ilin güzəştli kreditləri 50 milyon manata yaxınlaşdı
İqtisadiyyat Nazirliyinin Sahibkarlığa Kömək Milli Fondu iyunun 22-si Quba rayonunun Timiryazev qəsəbəsində işgüzar forum keçirib. Economy.gov.az-ın məlumatına görə, fondun icraçı direktoru Şirzad Abdullayev forumda deyib ki, 2017-ci ildə 653 sahibkarlıq subyektinin investisiya layihəsinin maliyyələşdirilməsinə 50 milyon manata yaxın güzəştli kredit yönəldilib: “Bu kreditlərdən istifadə etməklə investisiya layihələrinin reallaşdırılması 2000-ə yaxın yeni iş yerinin yaradılmasına imkan yaradır. Ümumilikdə isə indiyədək Quba-Xaçmaz iqtisadi rayonunda fəaliyyət göstərən sahibkarlıq subyektlərinin 2380 investisiya layihəsinin maliyyələşdirilməsinə 186,2 milyon manat güzəştli kredit verilib”.
İşgüzar forum çərçivəsində Quba-Xaçmaz iqtisadi rayonunda fəaliyyət göstərən 37 sahibkar 1 milyon manatdan çox güzəştli kredit alıb. Kreditlərin heyvandarlıq və bağçılıq təsərrüfatlarının, istixana kompleksinin genişləndirilməsinə, tikinti materiallarının istehsalına və s. sahələrə yönəldiləcəyi və 70-ə yaxın yeni iş yerinin açılmasının mümkün olacağı bildirilir.
