Vergi pozuntuları və cərimələr
Vergilər Nazirliyinin Vergi Öhdəliklərinin İcrasına Nəzarət Departamentinin baş direktoru Zeynalabdin Məmmədzadə Vergiler.az-a açıqlamasında 2017-ci ilin ilk beş ayının göstəricilərindən danışıb. O deyib ki, pul vəsaitinin uçotdan gizlədilməsi və ya uçota alınmaması hallarına, malların Vergi Məcəlləsi ilə müəyyən edilən qaimə-faktura, elektron qaimə-faktura və ya elektron vergi hesab-fakturası əsasında alınmasına nəzarət məqsədilə 2017-ci ilin yanvar-may ayları ərzində vergi nəzarəti tədbiri keçirilən 1042 obyektdən 942-də pozuntu faktları aşkar edilib, 32 milyon 936,1 min manat həcmində uçotdan gizlədilmiş pul vəsaiti, 41 milyon 99 min manat məbləğində uçotdan gizlədilmiş mallar müəyyən olunaraq həmin vergi ödəyicilərinə ümumilikdə 5 milyon 454,6 min manat məbləğində maliyyə sanksiyası tətbiq edilib.
Departament rəhbərinin sözlərinə görə, nağdsız hesablaşmaların həyata keçirilməsi ilə bağlı qanunla müəyyən olunmuş tələblərə əməl olunması üzrə hesabat dövründə 55 obyektdə keçirilən vergi nəzarəti tədbirləri nəticəsində 31 obyektdə qanunvericiliyin tələblərinin pozulması faktları qeydə alınıb, pozuntuya yol vermiş vergi ödəyicilərinə 119,9 min manat məbləğində qoyulub.
Hesabata əsasən, yanvar-may ayları ərzində 555 obyektdə aparılan vergi nəzarəti tədbirləri nəticəsində 329 obyekt üzrə 1987 nəfər şəxsin müvafiq qaydada rəsmiləşdirilmədən işlərin yerinə yetirilməsinə cəlb edildiyi aşkar olunub. Qanun pozuntusuna yol vermiş şəxslərə 1 milyon 735 min manat məbləğində cərimə kəsilib.
