Məzənnələrdə nə yenilik var?
Mərkəzi Bank iyunun 22-də ABŞ dollarının kursunu 1,7022 manat səviyyəsində saxlayıb. Bu rəsmi məzənnə ötən gündən qüvvədədir.
Bəzi valyutalarda isə yeniliklər var. Avro 1,8952 manatdan 1,9015 manata qalxıb, Rusiya rublu 0,0285 manatdan 0,0283 manata enib.
Gürcü larisi 0,7043, ingilis funt sterlinqi 2,1569, türk lirəsi 0,482 manata satılır (Məzənnələr).
Novator.az xatırladır ki, ABŞ-ın mərkəzi bankı olan Federal Ehtiyat Sistemi (FES) iyunun 14-də uçot dərəcəsini 1-1,25%-dək artırıb. Bu, 2017-ci ildə ikinci artım olub. Martın 15-də uçot dərəcəsi 0,5-0,75%-dən 0,75-1%-dək yüksəlmişdi.
Uçot dərəcəsi kommersiya banklarına verilən borclar üzrə faiz dərəcəsidir. FES ötən il dekabrın 14-də uçot dərəcəsinin 0,25% artırılması barədə qərar çıxarmış, yuxarı hədd 0,5 faizdən 0,75%-ə çatmışdı.
2015-ci il dekabrın 16-da isə uçot dərəcəsinin yuxarı həddi 0,25%-dən 0,5 faizə qalxmış, bu, digər valyutalara, o sıradan Azərbaycan manatına təzyiqi artırmış, dollar birdən-birə 50 qəpik bahalaşmışdı.
2017-ci ildə dollar 1,7707 manatla start götürüb. Ən yuxarı rəsmi qiymət yanvarda 1,9165, fevralda 1,92, martda 1,7563, apreldə 1,7244, mayda 1,7026 manat olub. İyun ayı 1,702 manat kursla başlayıb.
