İlk raundlardakı rəqiblər
Azərbaycan komandalarının UEFA Çempionlar Liqası və Avropa Liqasının ilk mərhələlərindəki rəqibləri bəlli olub. Novator.az-ın məlumatına görə, püşk Çempionlar Liqasına ikinci mərhələdən qoşulacaq “Qarabağ”a Gürcüstanın “Samtredia” klubunu qismət edib. İlk oyun iyulun 11-i və ya 12-si Bakıda keçiriləcək.
Avropa Liqasının birinci mərhələsində yer alan “İnter” Serbiyanın “Mladost” klubu ilə, “Zirə” Lüksemburqun “Differdanj” klubu ilə qarşılaşacaq. “İnter”in ilk oyunu iyunun 29-u səfərdə, “Zirə”nin ilk oyunu həmin gün Bakıda olacaq.
Mərhələ adlayacağı halda “İnter” növbəti raundda “Fola” (Lüksemburq) – “Milsami” (Moldova) cütlüyünün qalibinə, “Zirə” Rumıniyanın “Astra” klubuna rəqib olacaq.
Turnirə ikinci mərhələdən qoşulacaq “Qəbələ” ilk raunddakı “Yaqelloniya” (Polşa) – “Dinamo” (Batumi, Gürcüstan) cütlüyünün qalibini gözləyir.
2017-2018 mövsümündə UEFA-nın klub turnirlərində 236 komanda buraxılıb. 79 komanda Çempionlar Liqasına, 157 komanda Avropa Liqasına vəsiqə alıb.
İspaniya, Almaniya, İngiltərə klub turnirlərinə 7 komanda, İtaliya, Portuqaliya, Fransa 6 komanda, Rusiya, Ukrayna, Belçika, Hollandiya, Türkiyə, İsveçrə, Çexiya, Yunanıstan, Rumıniya 5 komanda ilə çıxır.
Mübarizəyə 4 komanda ilə bu UEFA üzvləri qoşulur: Avstriya, Xorvatiya, Polşa, Kipr, Belarus, İsveç, Norveç, İsrail, Danimarka, Şotlandiya, Azərbaycan, Serbiya, Qazaxıstan, Bolqarıstan, Sloveniya, Slovakiya, Macarıstan, Moldova, İslandiya, Gürcüstan, Finlandiya, Bosniya, Albaniya, Makedoniya, İrlandiya, Latviya, Lüksemburq, Monteneqro, Litva, Şimali İrlandiya, Estoniya, Ermənistan, Farer adaları, Malta, Uels.
Cəbəllütariq, Andorra, San Marino 3 komanda, Kosovo 2 komanda, Lixtenşteyn 1 komanda ilə yarışacaq.
