Dövlət Reklam Agentliyi yaradıldı, təyinat oldu
Prezident İlham Əliyev “Azərbaycan Respublikasının Dövlət Reklam Agentliyi” publik hüquqi şəxsin yaradılmasına fərman verib. İyunun 20-də imzalanan sənəddə qurumun məqsədinin açıq məkanda reklam daşıyıcılarının yerləşdirilməsi, həmin reklam daşıyıcıları üzərində yerləşdirilməsi nəzərdə tutulan reklamların istehsalı (hazırlanması) və yayımlanması sahəsində vahid tənzimləməni və nəzarəti təmin etmək olduğu bəyan edilib.
Novator.az bildirir ki, fərmana əsasən, Prezident Administrasiyası publik hüquqi şəxsin nizamnaməsinin layihəsini və təsisçisinin səlahiyyətlərini həyata keçirənlər barəsində təkliflərini on beş gün müddətində hazırlamalıdır.
Publik hüquqi şəxs dövlət qeydiyyatına alındığı günədək açıq məkanda reklam yerləşdirilməsi “Reklam haqqında” qanunla müəyyənləşmiş qaydada davam etdiriləcək.
İlham Əliyevin həmin gün imzaladığı sərəncamla Aydın Münsüf oğlu İbadov Dövlət Reklam Agentliyinin direktoru təyin olunub.
