Daha iki universitetin statusu dəyişdi
Bakı Dövlət Universiteti və Azərbaycan Dövlət İqtisad Universiteti ilə bağlı prezident sərəncamı imzalanıb. İyunun 21-də verilən sərəncama əsasən, hər iki universitet Təhsil Nazirliyinin tabeliyində publik hüquqi şəxs statusu alır, çevrilmə yolu ilə yenidən təşkil edilir.
Nazirlər Kabineti publik hüquqi şəxslərin nizamnamələrinin layihələrini və təsisçilərinin səlahiyyətlərini həyata keçirənlər barəsində təkliflərini iki ay müddətində hazırlayıb prezidentə təqdim etməlidir.
Novator.az xatırladır ki, iyunun 16-da Azərbaycan Dillər Universitetinin Təhsil Nazirliyinin tabeliyində publik hüquqi şəxsə çevrilməsinə sərəncam verilib.
Publik hüquqi şəxs – dövlət və bələdiyyənin və ya publik hüquqi şəxsin yaratdığı, ümumdövlət və ictimai əhəmiyyət daşıyan fəaliyyətlə məşğul olan, dövlət və ya bələdiyyə orqanı olmayan təşkilatdır. 2015-ci ilin dekabrında qəbul edilmiş “Publik hüquqi şəxslər haqqında” qanuna görə, publik hüquqi şəxsin pullu xidmətlər göstərmək, özünü maliyyələşdirmək hüququ var. Onun əmlakı nizamnamə fondundan, təsisçilərin verdiyi digər əmlakdan, habelə dövlət və ya yerli büdcələrdən ayrılan vəsaitlərdən, fəaliyyət istiqamətlərinə uyğun olaraq görülən işlərdən, göstərilən xidmətlərdən əldə edilən daxilolmalardan, ianələrdən, qrantlardan və nizamnamədə müəyyən edilmiş digər mənbələrdən daxil olan vəsaitlərdən formalaşa bilər.
