Azərbaycanda neçə balıq vətəgəsi var?
Hazırda Azərbaycanda 151 balıq vətəgəsi var. Bunu Ekologiya və Təbii Sərvətlər Nazirliyinin Su Hövzələrində Bioloji Resursların Artırılması və Mühafizəsi Departamentinin baş müfəttişi İsmayıl Yunusov AZƏRTAC-a müsahibəsində deyib.
O bildirib ki, bu il Xəzər dənizinin Azərbaycana aid sahil sularında və daxili su hövzələrində 8 hüquqi və 143 fiziki şəxs vətəgə yaradıb və hazırda onlar qanuni balıq ovu ilə məşğul olurlar.
İsmayıl Yunusov vurğulayıb ki, sənaye balıq ovunun aparılması üçün Su Hövzələrində Bioloji Resursların Artırılması və Mühafizəsi Departamentinin icazəsi olmalıdır. Bunun üçün ərizə, şəxsiyyət vəsiqəsi, istifadəçi hüquqi şəxs olduqda dövlət qeydiyyatı haqqında şəhadətnamə, istifadəçi hüquqi şəxs yaratmadan sahibkarlıq fəaliyyəti ilə məşğul olan fiziki şəxs olduqda fiziki şəxsin vergi uçotu haqqında şəhadətnamə, balıqovlayan gəminin və motorlu qayığın üzgüçülüyə yararlılığı haqqında şəhadətnamə, gəmi və ya qayıq üzərində mülkiyyət hüququnu təsdiq edən sənəd, balıq ovunda iştirak edəcək balıqçının adı, atasının adı, soyadı barədə məlumatlardan ibarət sənədlər lazımdır.
Akvakultura, elmi-tədqiqat, maarifləndirmə, nəzarət və iqlimləşdirmə məqsədilə balıq ovu üçün həmin sənədlərlə yanaşı, bioloji-texnoloji əsaslandırmanın, maarifləndirmə layihəsinin elmi-tematik planın surəti də təqdim edilir.
