Səmədovla bağlı qərar verildi
Azərbaycan İslam Partiyasının lideri Mövsüm Səmədov 3 il müddətinə həbsxana rejiminə keçirilir. Vəkil Yalçın İmanov Novator.az-a deyib ki, iyunun 14-də Qaradağ Rayon Məhkəməsi 12 saylı Cəzaçəkmə Müəssisəsinin rəisi Rauf Məmmədovun vəsatətinə baxaraq belə qərar çıxarıb. Qərarı əsassız saydığını vurğulayan Yalçın İmanov apellyasiya şikayəti veriləcəyini deyib.
Rauf Məmmədov təqdimatında yazıb ki, məhkum Mövsüm Səmədov birgəyaşayış qayda və ənənələrinə hörmətlə yanaşmayaraq cəzanın icrası və çəkilməsi qaydalarını mütəmadi, qərəzli şəkildə pozur. Mövsüm Səmədov barəsində 28 dəfə tənbeh tədbirləri görüldüyü qeyd edilib.
Təqdimata görə, Mövsüm Səmədov müəssisədə cəza çəkdiyi müddət ərzində radikal şiə yönündə söhbətlər aparıb, ətrafına bu məqsədlə məhkumları toplamağa çalışıb.
Məhkumun müəssisə əməkdaşlarını şantaj etməyə, onlara hədə-qorxu gəlməyə, məhkumları əməkdaşlara qarşı itaətsizliyə sövq etməyə meylli olduğu vurğulanıb, qeyri-qanuni hərəkətləri ilə ümumi məhkum kütləsinin islah olunmasına mənfi təsir göstərdiyi qeyd edilib.
Mövsüm Səmədov 2011-ci ilin yanvarından həbsdədir. O, hakimiyyəti zorla ələ keçirmə cəhdi və başqa ağır cinayətlərdə təqsirli bilinərək 12 il müddətinə azadlıqdan məhrum olunub.
2014-cü ildə Qaradağ Rayon Məhkəməsi 12 saylı Cəzaçəkmə Müəssisəsi rəisinin Mövsüm Səmədovla bağlı verdiyi təqdimata əsaslanaraq məhbusun 2 il müddətinə həbsxana rejiminə keçirilməsi qərarı çıxarıb. Mövsüm Səmədov Qobustan həbsxanasından 12 saylı Cəzaçəkmə Müəssisəsinə 2016-cı il noyabrın 28-də qaytarılıb.
