Binaların zəlzələyə davamlılığı yeni metodla öyrəniləcək
Azərbaycanda binaların seysmikliyə davamlılığının öyrənilməsi üçün yeni metodlar tətbiq ediləcək. Bunu Azərbaycanda səfərdə olan Kanadanın Geologiya Xidmətinin əməkdaşı, Viktoriya Universitetinin professoru Tuna Onur Milli Elmlər Akademiyası nəzdində Respublika Seysmoloji Xidmət Mərkəzində təqdimatla çıxış edərkən deyib.
ABŞ, Kanada və Avropada tətbiq edilən metodlardan danışan Tuna Onur həmin metodların Azərbaycanda da tətbiq ediləcəyini, artıq bununla bağlı yerli əməkdaşlar üçün təlimə başladığını söyləyib.
Respublika Seysmoloji Xidmət Mərkəzinin baş direktoru, AMEA-nın müxbir üzvü Qurban Yetirmişli isə bildirib ki, bu vaxta qədər də Azərbaycanda tikilən binaların hər birinin ayrıca seysmik davamlılığı hesablanır. Ölkədə ən müasir metodların tətbiqinin vacib olduğunu qeyd edən baş direktor gənc kadrların bu sahəyə yönəldildiklərini söyləyib.
