İşsizlikdən sığorta qanunu gəlir
Milli Məclis iyunun 13-də “İşsizlikdən sığorta haqqında” qanuna ilk oxunuşda səs verib.
Qanun dövlət orqanının, hüquqi şəxsin ləğv edilməsi və ya işçilərin sayının, ştatların ixtisar edilməsi nəticəsində əmək münasibətlərinə xitam verilmiş şəxslərə şamil edilir. Siyasi vəzifə tutan şəxslər istisnadır.
Novator.az-ın məlumatına görə, layihəyə əsasən, işsizlikdən sığorta üzrə sığorta tarifləri bu faiz dərəcələri ilə müəyyən edilir: sığortaolunan tərəfindən ödənilən sığorta haqqı üzrə – işçinin əməkhaqqının 0,5 faizi; sığortaedən tərəfindən ödənilən sığorta haqqı üzrə – hesablanmış əməyin ödənişi fondunun 0,5 faizi.
Sığorta haqqını sığortaedən hesablayır. Hər ay üçün hesablanmış sığorta haqqı əməkhaqqı ödənişləri ilə eyni vaxtda, lakin sonrakı ayın 15-dən gec olmayaraq, tam məbləğdə sığortaçıya ödənilir.
Sığorta ödənişinin bu növləri var: əsas sığorta ödənişi; sığorta ödənişinə əlavə; minimum sığorta ödənişi.
Sığorta ödənişi sığorta stajından asılı olaraq onun itirilmiş orta aylıq əməkhaqqının məbləğinə bu faiz dərəcələri tətbiq olunmaqla hesablanır: sığorta stajı 3 ildən 5 ilə qədər olduqda – 50 faiz; sığorta stajı 5 ildən 10 ilə qədər olduqda – 55 faiz; sığorta stajı 10 ildən yuxarı olduqda – 60 faiz.
