Həmməruzəçilər dövlət başçısı və müxalifət liderləri ilə görüşüblər
Avropa Şurası Parlament Assambleyasının (AŞPA) Monitorinq Komitəsinin həmməruzəçiləri Sezar Florin Predanı və Stefan Şennak Azərbaycanda səfərdədirlər.
İyunun 13-də prezident İlham Əliyev həmməruzəçiləri qəbul edib. AZƏRTAC xəbər verir ki, görüşdə Azərbaycanla AŞPA arasında əməkdaşlığın hazırkı vəziyyəti və perspektivləri ilə bağlı məsələlər müzakirə olunub, əməkdaşlıq əlaqələrinin daha da inkişaf etdirilməsi imkanları ətrafında fikir mübadiləsi aparılıb.
İyunun 12-də isə həmməruzəçilərin Xalq Cəbhəsi, Müsavat və Liberal partiyalarının, “Respublikaçı Alternativ” hərəkatının rəhbərləri ilə görüşü olub.
AXCP sədri Əli Kərimli “Amerikanın səsi”nə müsahibəsində bildirib ki, görüşdə Azərbaycanda son repressiya dalğasından, insan haqları sahəsində vəziyyətin daha da pisləşməsindən, həbslərin artmasından, mediaya qarşı təzyiqlərin yüksək həddə çatmasından danışıb.
Əli Kərimlinin sözlərinə görə, siyasi həbslər ətraflı müzakirə edilib: “Siyasi məhbusların əksərinin işini ayrı-ayrılıqda müzakirə etdik. O cümlədən AXCP-yə qarşı xüsusi qərəzli münasibət müzakirə olundu. Mənim AXCP sədri olaraq hazırda azadlıqda heç bir müavinim, müşavirim və köməkçim qalmayıb. Həmməruzəçilərlə görüşdə AXCP-yə qarşı düşünülmüş qəddar münasibət də ayrıca müzakirə edildi”.
