Daha bir komanda Rusiyaya doğru addım atdı
Okeaniya zonasında 2018-ci ilin dünya futbol çempionatına vəsiqə uğrunda seçmə mərhələ finişə yol alıb. Novator.az-ın məlumatına görə, iyunun 13-ü səfərdə Papua Yeni Qvineyanı 2:1 hesabı ilə udan Solomon adaları B qrupunda mübarizəni 9 xalla ilk sırada bitirib.
Solomon adaları növbəti mərhələdə A qrupunun qalibi Yeni Zelandiya ilə iki oyun keçirəcək. Bu cütlüyün qalibi dünya çempionatına vəsiqə üçün Cənubi Amerika təmsilçisi ilə yarışacaq.
10 komandanın bir qrupda yarışdığı Cənubi Amerikadan Braziliya dünya çempionatına vəsiqə alıb. Lider Braziliyanın ardınca dünya çempionatına birbaşa vəsiqə zonasında Kolumbiya, Uruqvay və Çili qərar tutub. Argentina beşinci yerdədir. Bu yer Okeaniya zonasının qalibi ilə üz-üzə gəlmək imkanı verir.
Final mərhələsi Rusiyada 32 komandanın iştirakı ilə keçiriləcək. Çempionat sahibi və Braziliya ilə yanaşı daha bir iştirakçı məlumdur. Asiyadan İran ötən gün dünya çempionatına vəsiqə alıb.
