Aksiyaların təşkilatçısı həbsə getdi
Rusiyanın paytaxtı Moskvada tutulan müxalifət lideri Aleksey Navalnı 30 sutka inzibati həbs cəzası alıb. Novator.az-ın məlumatına görə, qərarı Simonov Rayon Məhkəməsi iyunun 13-nə keçən gecə çıxarıb. Aleksey Navalnı Moskvanın mərkəzində sanksiyalaşdırılmayan kütləvi aksiyaya çağırışda və hüquq mühafizə orqanlarına tabeçilik göstərməməkdə təqsirli bilinib.
İyunun 12-si paytaxt Moskvada və Rusiyanın başqa şəhərlərində korrupsiya əleyhinə kütləvi aksiyalar keçirilib, hakimiyyətin ünvanına sərt şüarlar səslənib. Aleksey Navalnı həmin gün evindən çıxarkən saxlanıb.
Rəsmilər Moskvadakı aksiyaya 5 minə yaxın adamın qatıldığını, 150 nəfərin tutulduğunu açıqlayıb.
Aleksey Navalnı Korrupsiya ilə Mübarizə Fonduna başçılıq edir. Fondun 12 iyun aksiyalarının 187 şəhəri əhatə etdiyi bildirilir.
18-ci ildir Rusiyanı eyni şəxs – Vladimir Putin idarə edir. Vladimir Putin 1999-cu il avqustun 16-da baş nazir təyin olunub. 1999-cu il dekabrın 31-dən həmçinin prezident vəzifəsini icra edib. 2000-ci il martın 26-da prezident seçilib. 2004-cü il seçkisində bu postu əlində saxlayıb. 2008-ci ilin may ayından Rusiyanın baş naziri olub. 2012-ci il martın 4-də yenidən prezident seçilib.
