Makron parlamenti də ələ keçirir
Fransada parlamentin aşağı palatasına – Milli Məclisə iyunun 11-də keçirilmiş seçkinin nəticələri açıqlanıb. Novator.az-ın məlumatına görə, prezident Emmanuel Makronun başçılıq etdiyi “İrəli, respublika” hərəkatı 28,21%-lə qalib olub.
Müxalif Respublikaçılar Partiyası 15,77% səslə ikinci, Milli Cəbhə 13,2% səslə üçüncü, solçu Fəthedilməz Fransa Partiyası 11,02% səslə dördüncü yeri tutub.
Bu ilin may ayına qədər hakim partiya olmuş Sosialist Partiyası isə 7,44% səs toplayıb.
Seçkidə prezident partiyası ilə qüvvələrini birləşdirmiş Demokratik Hərəkat Partiyası seçicilərin 4,11%-nin dəstəyini alıb.
Milli Məclis 577 təkmandatlı dairədə seçilir. İlk turda namizədlərin böyük qismi 50%-dən çox səs toplaya bilmədiyi üçün iyunun 18-də ikinci tur keçiriləcək.
39 yaşlı Emmanuel Makron bu il mayın 7-də prezident seçilib. O, əvvəllər Sosialist Partiyasının üzvü olub, 2014-2016-cı illərdə iqtisadiyyat, sənaye və rəqəmli texnologiyalar naziri postunu tutub. 2016-cı ildə “İrəli, respublika” hərəkatını yaradıb.
