Əlillərə xidmət hesabatı
Əmək və Əhalinin Sosial Müdafiəsi Nazirliyi bildirir ki, yanvar-may aylarında əlilliyi olan 3 min 997 nəfərə protez-ortopedik bərpa xidmətləri göstərilib. Rəsmi məlumata görə, onların 500 nəfərə yaxını ölkənin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olan vətəndaşlardır.
Əlilliyi olan şəxslərə 5 ayda 632 ədəd aşağı və yuxarı ətraf, habelə döş protezi, 724 ədəd yuxarı və aşağı ətraf ortezi, 3 min 956 ədəd müxtəlif reabilitasiya vasitəsi, 210 ədəd bel və boyun nahiyəsi üçün korset, 1064 cüt protez ayaqqabı, 1877 cüt ortopedik ayaqqabı, 192 ədəd dördayaqlı dayaq vasitəsi verilib.
Bu təbəqədən olan insanlar həmçinin 26 ədəd eşitmə aparatı, 298 cüt qoltuqaltı və 518 cüt dirsəkaltı ağac, 723 ədəd əsa ilə təmin edilib, 335 reabilitasiya vasitəsi və protez-ortopedik məmulat təmir edilərək yenidən istifadəyə qaytarılıb. Ümumilikdə ilin 5 ayı ərzində əlilliyi olan şəxslər 12 minə yaxın protez-ortopedik məmulat və reabilitasiya vasitəsi ilə təmin olunub.
Protez-Ortopedik Bərpa Mərkəzi, onun Gəncə şəhərindəki filialının stasionar bölmələrində son 5 ayda əlilliyi olan 223 şəxsə stasionar şəraitdə reabilitasiya xidmətləri (protezləşməyə hazırlanma və ya protezlə hərəkət edilməsinin öyrədilməsi, onurğa sütunu zədələnmiş spinal əlillərin və skoliozlu uşaqların reabilitasiyası) göstərilib.
