İnternet mediası: gənclər yeniyetmələri öyrədir
“İnternyus Azərbaycan” İctimai Birliyi regionlardan olan yeniyetmələrin sosial media resurslarına inteqrasiyasını gücləndirmək, informasiya-kommunikasiya texnologiyaları üzrə bacarıqlarını artırmaq və praktik vərdişlərini təkmilləşdirmək məqsədilə yay düşərgəsi keçirib.
İyunun 8-dən 13-dək Novxanıda təşkil olunan yay düşərgəsi ABŞ-ın Azərbaycandakı səfirliyinin dəstəklədiyi “Regional internet mediasının inkişafı” layihəsi çərçivəsində reallaşdırılıb.
Müxtəlif regionlardan 15 yeniyetmənin qatıldığı yay düşərgəsində xüsusi hazırlanmış təlim proqramı vasitəsilə sosial mediadan effektiv istifadə qaydaları öyrədilib.
Yeniyetmələr sosial mediada kommunikasiya strategiyası, yeni media istifadəçilərinin etik davranışları istiqamətində nəzəri biliklərə yiyələnməklə yanaşı, SMM, PR, multimedia və infoqrafika, bloqçuluq, auidio və video fayllarla işləmək üsullarına dair təcrübələr keçiblər.
Yay düşərgəsini “İnternyus Azərbaycan” İctimai Birliyində xüsusi təlim proqramını mənimsəmiş beş sosial media fəalı – Ramid İbrahimov, Şəhriyar İsmayılzadə, Lalə İskəndərli, Kənan Bahadıroğlu və Fərid Ağalarov aparıb.
Düşərgədə uğurlu nəticələr göstərən yeniyetmələrə sertifikatlar verilib.
Layihənin sonrakı mərhələsində yay düşərgəsində iştirak etmiş yeniyetmələrin yaşadıqları rayonlarda hazırladığı və fərdi bloqlarında yerləşdirdikləri, yerli saytlarda dərc etdirdikləri sosial media xəbərlərinin, audio və video reportajların daha geniş miqyasda – ölkə mediasında və sosial şəbəkədə yayılmasına yardım göstəriləcək.
