Cocuq Mərcanlı kəndindən yeni fotolar
İyunun 12-də AZƏRTAC Cəbrayıl rayonunun Cocuq Mərcanlı kəndindən yeni fotolar yayıb.
Ermənistan silahlı birləşmələri Cocuq Mərcanlını 1993-cü ilin oktyabrında tutub. 1994-cü ilin yanvarında Azərbaycan Ordusu kəndi işğaldan azad edib. 2016-cı ilin aprel ayından ordu ətraf ərazilərə nəzarət edir və Cocuq Mərcanlı kəndində insanların təhlükəsiz yaşaması mümkün olub.
Bu il prezident İlham Əliyev Cocuq Mərcanlı kəndinin bərpasına sərəncamlar verib.
AZƏRTAC bildirir ki, Cocuq Mərcanlı bərpa olunaraq ikinci həyatına qovuşur. Tikilən 50 evdən 20-si ikiotaqlı, 25-i üçotaqlı, 5-i dördotaqlıdır. Küçələrdə gecə işıqlandırma sistemi qurulub. Su, qaz, telefon xətləri çəkilib, 100 kubmetrlik su anbarı inşa edilib. Subartezian quyusu qazılıb. Qəsəbədaxili yollara və səkilərə asfalt örtüyü salınıb, yaşıllaşdırma işləri aparılıb. Həmçinin 35/10 kilovoltluq yeni yarımstansiya inşa edilib.
Növbəti mərhələdə isə 150 evin və digər infrastrukturun tikintisi və bərpası nəzərdə tutulur.
Cocuq Mərcanlıda 96 şagird yerlik məktəb binası da inşa edilib.
Qəsəbədə Şuşa məscidinin bənzəri də inşa olunub. Ərazisi 50 sot olan məscidin tikinti sahəsi 556 kvadratmetr, minarələrin hündürlüyü 26 metrdir.
