“Aralın quruması zəmanəmizin ən böyük ekoloji fəlakətidir”
“Aralın quruması zəmanəmizin ən böyük ekoloji fəlakətidir”. BMT-nin baş katibi Antonio Quterreş Özbəkistanda səfərdə olarkən belə deyib.
Qaraqalpaqstana gedib, vertolyotla qurumaqda olan Aral dənizi akvatoriyasını, ətraf əraziləri seyr edən BMT-nin baş katibi bildirib ki, 1960-cı ildə böyüklüyünə görə dünyada dördüncü olan Aral gölü (məhz böyük olduğuna görə dəniz deyilir) qurumaqda davam edir və bu ekoloji fəlakətə səbəb regionda su ehtiyatlarından səmərəli istifadə edilməməsidir.
“Bu bizim hamımız üçün dərs olmalıdır” deyən baş katib vurğulayıb ki, Aralın quruması onda şok effekti yaradıb.
Son 40 ildə Aral dənizində suyun həcmi beş dəfə azalıb, səthi 18 metr aşağı düşüb, duzluluq artıb. Əvvəl dənizin sahili Muynak qəsəbəsinin yaxınlığında olan Aral indi təxminən 150 kilometr çəkilib, balıq yoxa çıxıb.
1993-cü ilin yanvar ayında Özbəkistan, Qazaxıstan, Türkmənistan, Qırğızıstan və Tacikistan dövlətləri Aralın Xilası üzrə Beynəlxalq Fond yaradıblar. 2008-ci ilin dekabrından bu fondun BMT-də müşahidəçi statusu var.
AZƏRTAC
