Əziz Qaraşoğlunun şikayəti təmin olunmayıb
İyunun 9-da Bakı Apellyasiya Məhkəməsində “Kanal 13” internet televiziyasının direktoru Əziz Qaraşoğlunun (Orucov) həbs olunması haqda Nəsimi Rayon Məhkəməsinin qərarından verilmiş apellyasiya şikayətinə baxılıb.
Jurnalistin vəkili Cavad Cavadovun Azadliq.info-ya verdiyi məlumata görə, şikayətə hakim Vüqar Məmmədovun sədrliyi ilə baxılıb.
Məhkəmədə Əziz Qaraşoğlunun özü də iştirak edib. Şikayət təmin olunmayıb.
Əziz Qaraşoğluya qarşı Cinayət Məcəlləsinin 192.2-ci (qanunsuz sahibkarlıq və külli miqdarda gəlir əldə etmə) və 308.2-ci (ağır nəticələrinə səbəb olan vəzifə saxtakarlığı) maddələri ilə cinayət işi başlanıb.
İş Baş Prokurorluğun Ağır Cinayətlərə Dair İşlər üzrə İstintaq İdarəsinin icraatındadır.
İyunun 1-də həmin idarənin təqdimatına əsasən Nəsimi Rayon Məhkəməsində Əziz Qaraşoğlu barəsində 4 ay müddətinə həbs qətimkan tədbiri seçilib.
Bundan bir qədər əvvəl – mayın 2-də Əziz Qaraşoğlu polisə müqavimətdə təqsirli bilinərək 30 sutka inzibati həbs cəzası almışdı. Onun barəsində həbs qətimkan tədbiri inzibati həbs müddətinin başa çatmaqda olduğu dövrdə seçilib.
Jurnalistin həbsindən sonra “Kanal 13″ün ofisində və Əziz Qaraşoğlunun evində axtarış aparılıb.
