Mey hökumət qurmaq hüququ aldı
Mühafizəkarlar Partiyasının lideri, baş nazir Tereza Mey iyunun 9-da Böyük Britaniya kraliçasından yeni hökumət qurmaq icazəsi alıb.
Novator.az bildirir ki, Böyük Britaniyada iyunun 8-də keçirilmiş növbədənkənar parlament seçkisində hakim Mühafizəkarlar Partiyası 650 yerlik İcmalar Palatasına 318 mandat qazanıb. Hökumət qurmaq üçün 326 mandat tələb olunur, ona görə Mühafizəkarlar Partiyası ya koalisiyaya getməli, ya da azlıq hökuməti qurmalıdır.
8 iyun seçkisində ana müxalifət – Leyboristlər Partiyası İcmalar Palatasında 261 yer əldə edib.
Şotland Milli Partiyası 35, Liberal Demokrat Partiyası 12, Demokratik Birlik Partiyası 10 mandat götürüb, 13 mandat digər partiyalara qismət olub.
60 yaşlı Tereza Mey 1997-ci ildən İcmalar Palatasının deputatıdır. 2010-cu ildən qadın və bərabərlik məsələləri naziri postunu tutub, sonradan daxili işlər naziri olub.
Mühafizəkarlar Partiyasına 1997-ci ildə qoşulub, 2016-cı il iyulun 11-də qurumun lideri seçilib.
2016-cı il iyulun 13-də baş nazir postuna təyin edilib.
