Elektron müraciət: lider qurumlar və xidmətlər
Nəqliyyat, Rabitə və Yüksək Texnologiyalar Nazirliyi bu ilin ilk beş ayında elektron xidmətlərindən ən çox istifadə olunan qurumlar və ən çox müraciət olunan xidmətlərin statistikasını yayıb.
Bildirilir ki, “Elektron hökumət” portalında cari ildə xidmətlərindən ən çox istifadə olunan 10 dövlət qurumu Əmək və Əhalinin Sosial Müdafiəsi Nazirliyi, Nəqliyyat, Rabitə və Yüksək Texnologiyalar Nazirliyi, Dövlət İmtahan Mərkəzi, Dövlət Gömrük Komitəsi, “Azərsu” ASC, Daxili İşlər Nazirliyi, Əmlak Məsələləri Dövlət Komitəsi, Ədliyyə Nazirliyi, Mərkəzi Seçki Komissiyası və Vergilər Nazirliyidir.
Əmək və Əhalinin Sosial Müdafiəsi Nazirliyinin elektron xidmətlərinə ümumilikdə 4 milyon 577 min 529 dəfə müraciət olunub. Qurumun təqdim etdiyi “Ünvanlı sosial yardımla bağlı müraciətin edilməsi” elektron xidmətinə cari ildə 1 milyon 388 min 673 müraciət qeydə alınıb.
Nəqliyyat, Rabitə və Yüksək Texnologiyalar Nazirliyinin xidmətlərinə 3 milyon 88 min 725 dəfə müraciət edilib. Ən çox istifadə olunan “Mobil nömrə daşınması xidməti vasitəsilə digər şəbəkəyə daşınmış nömrələr barədə məlumatın verilməsi” xidmətidir: 1 milyon 692 min 360 istifadə.
İlk beşlikdə olan Dövlət İmtahan Mərkəzinin təqdim etdiyi elektron xidmətlərə 1 milyon 5 min 477 müraciət olub. Ən çox (384 min 492 dəfə) abituriyentlərin, bakalavrların, rezidenturaya sənəd verənlərin ərizələrinin onlayn qəbulu üzrə xidmətə müraciət qeydə alınıb.
Dövlət Gömrük Komitəsinə 332 min 638, “Azərsu” ASC-yə 59 min 596, Daxili İşlər Nazirliyinə 39 min 615, Əmlak Məsələləri Dövlət Komitəsinə 33 min 644, Ədliyyə Nazirliyinə 20 min 190, Mərkəzi Seçki Komissiyasına 16 min 822, Vergilər Nazirliyinə 14 min 470 dəfə müraciət qeydə alınıb.
