Valyuta ehtiyatları 39 milyard dollara çatıb
İyunun 8-i Bakıda 3-cü Azərbaycan-Avropa İttifaqı biznes forumu keçirilib. İqtisadiyyat Nazirliyi, AZPROMO və Almaniya-Azərbaycan Xarici Ticarət Palatasının birgə keçirdiyi tədbirdə rəsmi şəxslər, beynəlxalq təşkilatların, səfirliklərin, ticarət palatalarının nümayəndələri, Azərbaycandan 300, Avropa İttifaqı ölkələrindən 100-dən çox iş adamı iştirak edib.
Rəsmi məlumata görə, iqtisadiyyat naziri, Azərbaycanın Avropa İttifaqı ilə əməkdaşlığı üzrə dövlət komissiyasının sədri Şahin Mustafayev deyib ki, ölkənin xarici siyasətində Avropa İttifaqı ilə əməkdaşlığın inkişafı mühüm istiqamətlərdəndir və əlaqələr həm siyasi, həm də iqtisadi, o cümlədən enerji, ticarət, investisiyalar və digər sahələrdə inkişaf edir.
İqtisadiyyat naziri vurğulayıb ki, Avropa İttifaqı Azərbaycanın əsas xarici ticarət tərəfdaşıdır: “2016-cı ildə Avropa İttifaqının Azərbaycanın xarici ticarətindəki payı 35%, 2017-ci ilin 4 ayında isə 38% təşkil edib. Son 10 ildə Avropa İttifaqı Azərbaycanda əsas kapitala təqribən 20 milyard ABŞ dolları investisiya yatırıb. Azərbaycanda Avropa İttifaqı ölkələrinin 1300-dən çox şirkəti fəaliyyət göstərir.
Avropa İttifaqının 23 üzv ölkəsi ilə ikiqat vergitutmanın aradan qaldırılması, 17 üzv ölkə ilə sərmayələrin təşviqi və qorunması sazişləri, 7 üzv ölkə ilə strateji tərəfdaşlıq bəyannamələri imzalanıb, 13 üzv ölkə ilə hökumətlərarası komissiya fəaliyyət göstərir. Avropa İttifaqının bir sıra ölkələri ilə Azərbaycan arasında ticarət palataları mövcuddur”.
Ölkənin iqtisadi durumuna toxunan Şahin Mustafayev qeyd edib ki, 2017-ci ilin 4 ayında qeyri-neft sənayesi 2,8%, kənd təsərrüfatı 3,2%, ticarət dövriyyəsi 11,5%, ixrac təqribən 41%, qeyri-neft ixracı isə 23% artıb: “Bu dövrdə valyuta ehtiyatları 1,3 milyard ABŞ dollar artıb və 39 milyard ABŞ dolları təşkil edir. 1 aprel 2017-ci ilə valyuta ehtiyatları xarici borcdan 3,2 dəfə çoxdur”.
