Ukraynada NATO-ya üzvlük qanunu qəbul edildi
İyunun 8-də Ukrayna parlamenti ölkənin NATO-ya üzv olmaq niyyətini nəzərdə tutan qanun layihəsi qəbul edib. Novator.az-ın məlumatına görə, layihəni Ali Radanın 276 deputatı dəstəkləyib.
Qanun layihəsi müəllifləri NATO-ya üzvlük niyyətini ölkənin Rusiyanın təcavüzünə məruz qalması, bu fonda milli təhlükəsizliyi, suverenliyi və ərazi bütövlüyünü möhkəmləndirmək zərurəti ilə əsaslandırıb.
2014-cü ilin fevral ayında Ukraynada hakimiyyət xalq üsyanı ilə dəyişib, Rusiyaya yaxın qüvvələri Qərb meylli qüvvələr əvəzləyib. Bundan dərhal sonra Rusiya Ukraynanın Krım bölgəsini hərbi güclə tutaraq özünə birləşdirib və Donbasda iki separatçı rejimin əli ilə bu bölgənin bir hissəsini işğal edib.
1949-cu ildə yaradılmış NATO-ya hazırda 29 ölkə daxildir: ABŞ, Kanada, Türkiyə, İslandiya, Almaniya, Belçika, Norveç, Bolqarıstan, Böyük Britaniya, Çexiya, Danimarka, Estoniya, Fransa, Xorvatiya, İspaniya, İtaliya, Latviya, Litva, Lüksemburq, Macarıstan, Monteneqro, Niderland, Polşa, Portuqaliya, Rumıniya, Slovakiya, Sloveniya, Yunanıstan, Albaniya.
