Rusiyada “proksi saytlar”dan istifadəni yasaqlayan layihə hazırlanıb
Rusiyada bağlanmış saytlara dolayı yollarla daxil olmağı yasaqlayan qanun layihəsi hazırlanıb.
Novator.az xəbər verir ki, layihə artıq ölkə parlamentinə təqdim olunub.
Qanun layihəsinin müəllifləri deputatlar Maksim Kudryavtsev (Vahid Rusiya Partiyası), Nikolay Rıjak (Ədalətli Rusiya Partiyası) və Aleksandr Yuşşenkodur (Rusiya Kommunist Partiyası).
Layihədə Rusiya ərazisində yasaqlanmış informasiya mənbələrinə, habelə saytlara dolayı yollarla daxil olmağa imkan verən informasiya-kommunikasiya şəbəkələrindən, kompüter sistemləri və proqramlarından istifadənin qadağan edilməsi təklifi yer alır.
Qeyd edək ki, hər hansı ölkədə yasaqlanmış sayta adətən “proksi server” adlanan xidmətləri həyata keçirən saytlar vasitəsilə daxil olurlar.
Rusiya parlamentinə təqdim edilən layihədə qadağan olunmuş informasiya mənbələrinə, habelə saytlara dolayı yollarla daxil olmağa imkan verən informasiya-kommunikasiya şəbəkələri, kompüter sistemləri və proqramları deyiləndə də ilk növbədə “proksi server”lər və ya başqa sözlə, “proksi saytlar” nəzərdə tutulur. “Proksi” həmin şəbəkə, sistem və proqramların bir növ qeyri-rəsmi, ümumi adıdır.
“Proksi” (proxy) ingiliscədən tərcümədə “başqa addan istifadə etmək” mənasını verir. Belə xidmətləri həyata keçirən saytlar istifadəçiyə bloklanmış saytlara daxil olmaq imkanı yaradır.
Səidə Hüseynova
