Lisenziya hesabatı verilib
İqtisadiyyat Nazirliyi lisenziyalarla bağlı rəsmi hesabat yayıb. Prezidentin 19 oktyabr 2015-ci il fərmanı ilə 2 noyabr 2015-ci ildən lisenziyaları İqtisadiyyat Nazirliyi “ASAN xidmət” mərkəzləri vasitəsilə verir.
Hesabata görə, keçən müddətdə sahibkarlıq subyektlərinə 4 mindən çox lisenziya təqdim olunub. Onların 2200-dən çoxu yeni verilmiş, 1800-ü isə müddətsiz lisenziya ilə əvəz edilən lisenziyalardır.
2017-ci ilin ötən dövrü ərzində isə sahibkarlar 660 lisenziya alıb. Bunun 450-i yeni verilib, 210 lisenziya isə müddətsiz lisenziya ilə əvəz edilib.
Lisenziyalar əsasən əczaçılıq, özəl tibb, tikinti-quraşdırma işləri, tikintisinə icazə tələb olunan və barəsində məlumatlandırma icraatı tətbiq olunan bina və qurğuların layihələndirilməsi, baytarlıq preparatlarının satışı, bitki mühafizə vasitələrinin və aqrokimyəvi maddələrin idxalı, maye və təbii qaz təsərrüfatı obyektlərinin quraşdırılması, dağ-mədən işləri, dağ və buruq qazmalarının aparılması, yanğından mühafizə, qaldırıcı qurğuların, metallurgiya avadanlığının, təzyiq altında işləyən qazanların, tutumların quraşdırılması və təmiri, təhlükəli yüklərin nəqliyyat vasitəsilə daşınması, təhsil və s. fəaliyyət sahələrinə aiddir.
