Nazirlik məhbuslara və azadlığa çıxan şəxslərə nə xidmət göstərib?
Əmək və Əhalinin Sosial Müdafiəsi Nazirliyi bu ilin ilk rübündə penitensiar müəssisələrdə cəza çəkməkdən azad edilən 1143 nəfərə birdəfəlik müavinət verib. Onların hər biri minimum əməkhaqqının 4 misli qədər (464 manat) müavinət alıb.
Rəsmi məlumata görə, penitensiar müəssisələrdə peşə hazırlığının təşkili işləri Salyan rayonundakı 5 saylı Cəzaçəkmə Müəssisəsində davam etdirilib. Burada cəza müddəti başa çatmaqda olan 28 nəfər şəxs peşə hazırlığı kurslarına cəlb olunub. Müəssisənin nəzdindəki peşə tədrisi bazasında təşkil olunan peşə hazırlığı kurslarında 14 nəfərə inşaat rəngsazı, 14 nəfərə isə elektrik-qaz qaynaqçısı peşəsi üzrə bilik və bacarıqlar öyrədilir. Kursları bitirdikdən sonra həmin şəxslərə peşə şəhadətnamələri veriləcək.
Bu il penitensiar müəssisələrdə cəza müddəti başa çatmaqda olan 140 nəfər şəxs üçün elektrik-qaz qaynaqçısı, avtomobillərin təmiri üzrə çilingər, kompüter texnikasının təmiri, inşaat rəngsazı və s. peşələr üzrə peşə hazırlığı kursları təşkil edilib.
