Elektron hərracın qaydaları açıqlanıb
Əmlak Məsələləri Dövlət Komitəsi elektron hərrac xidməti ilə bağlı məlumat yayıb. Qeyd olunur ki, elektron hərrac xidməti “Nəqliyyat vasitələrinin və avadanlıqların hərraclar vasitəsilə satışı” prosedurunun avtomatlaşdırılmasını özündə birləşdirir: “Xidmət vasitəsilə vətəndaş olduğu yerdən hərracda iştirak edə bilər. İştirak üçün E-emdk.gov.az-ın əmlakların hərraclarla satışı hissəsində qeyd olunan 12-ci bölməyə müraciət etmək lazımdır. İstənilən vətəndaş elektron imzadan istifadə edərək Əmlak Məsələləri Dövlət komitəsinin elektron xidmətlər portalında və ya “Elektron hökumət” portalında (E-gov.az) qeydiyyatdan keçə bilər. Qeydiyyatdan keçmiş hər bir sifarişçi hərrac günü onlayn qaydada aktiv hərraca qatılmaq imkanı qazanır. Hərraclarda iştirak etmək üçün sifariş vermək də elektron qaydada həyata keçirilir.
Elektron hərrac bölməsində verilən xanaları doldurmaqla iştirak qaydaları ilə tanış olmaq mümkündür. İştirak qaydaları ilə tanış olduqdan sonra istifadəçinin sifariş verdiyi lotların siyahısı (şəxsi kabinet) göstərilir. Şəxsi kabinetdə administrator bütün istifadəçilərə real rejimdə mesajların göndərilməsini təmin edir.
Hərrac başladıqdan sonra ilk beş dəqiqə ərzində heç bir iştirakçıdan təklif gəlməsə, əlavə olunan bir dəqiqə ərzində bu vəziyyət yenə də təkrar olarsa, hərrac dayandırılır, baş tutmamış sayılır.
Hərrac rəqabətli keçdikdə isə iştirakçılar əmlakın ilkin satış qiymətindən əlavə təkliflər edirlər. Hər yeni təklif isə ilkin satış qiymətinin 1 faizindən az olmamalıdır. Ekranda bu barədə qırmızı şriftlə olan yazı iştirakçını xəbərdar edir. Hərracda ən yüksək qiymət təklif etmiş iştirakçı qalib elan edilir. Ekranda hərracın tarixi, əmlakın satılması barədə məlumat, satış qiyməti və qalib alıcının nömrəsi qeyd olunur.
Elektron hərracda udulmuş nəqliyyat vasitəsini müvafiq qurumlar qalib alıcının adına rəsmiləşdirir”.
