25 il əvvəl Laçında çəkilmiş fotoşəkil beynəlxalq mükafat alıb
AZƏRTAC-ın fotomüxbiri İlqar Cəfərov Serbiyada keçirilən “Good Light 2017” beynəlxalq foto müsabiqəsinin iki mükafatına layiq görülüb.
Müəllifin “Məktəbə” adlı fotosuna MOL PA (Master of Light Photographic Association) bürünc medalı verilib. Bu fotoşəkil 1992-ci ilin fevral ayında Azərbaycanın Laçın rayonunda çəkilib.
2017-ci ilin aprel ayında Bakıdakı Milli Gimnastika Arenasında bədii gimnastika üzrə dünya kuboku yarışları zamanı çəkilmiş “Cütlükdə uçuş” fotosu isə Amerika Fotoqraflar Cəmiyyətinin (PSA Honorable Mention) fəxri lentinə layiq görülüb.
Beynəlxalq Fotoqrafiya Sənəti Federasiyasının (FİAP) və Amerika Fotoqraflar Cəmiyyətinin himayəsi ilə keçirilən “Good Light 2017” beynəlxalq foto müsabiqəsinə dünyanın müxtəlif ölkələrindən 503 fotoqrafın 9445 işi təqdim edilib.
