Nazir Türkiyəyə aparıldı
Energetika naziri Natiq Əliyev Türkiyəyə aparılıb. Bakıdakı Mərkəzi Neftçilər Xəstəxanasından APA-ya bildiriblər ki, Natiq Əliyev müalicəsini Türkiyədə davam etdirəcək.
İyunun 4-də Natiq Əliyevin ürəyində problemlər yaranıb və o, Mərkəzi Neftçilər Xəstəxanasının reanimasiya şöbəsinə yerləşdirilib. Nazirin ürəyinə stendlər qoyulduğu açıqlanıb.
Novator.az bildirir ki, Natiq Əliyev 1947-ci il noyabrın 23-də Bakı şəhərində anadan olub. 1970-ci ildə Azərbaycan Neft və Kimya İnstitutunu dağ-mədən geoloqu ixtisası ilə bitirib.
“Xəzərdənizneftqazsənaye” İstehsalat Birliyinin “Azərdənizneftkəşfiyyat” trestində işləyib.
1971-ci ildən Azərbaycan Elmlər Akademiyasının Geologiya İnstitutunun aspiranturasında təhsil alıb, 1974-cü ildə geologiya-mineralogiya elmləri namizədi olub, böyük elmi işçi vəzifəsində işləyib.
1979-cu ildə “Xəzərneftqazsənaye”nin kompleks dəniz geoloji-kəşfiyyat kontorunda geologiya şöbəsinin rəisi vəzifəsinə təyin olunub.
1984-cü ildən Azərbaycan Kommunist Partiyası Mərkəzi Komitəsində təlimatçı, bölmə müdiri vəzifələrində işləyib.
1993-cü ildən 2005-ci ilə qədər Dövlət Neft Şirkətinin prezidenti olub. Nazir postuna 2005-ci ildə gətirilib.
2008-ci ildən iqtisad elmləri doktorudur.
