Dövlət Sərhəd Xidmətinin rəisi Sərhəd Qoşunlarının komandanı statusunu itirdi
İyunun 5-də prezident İlham Əliyev Dövlət Sərhəd Xidmətinin əsasnaməsinin və strukturunun dəyişdirilməsi haqda fərman imzalayıb.
Novator.az bildirir ki, fərmanda əsas yenilik Dövlət Sərhəd Xidməti rəisindən Sərhəd Qoşunlarının komandanı statusunun alınmasıdır.
İndiyədək Dövlət Sərhəd Xidmətinin rəisi avtomatik olaraq həm də Sərhəd Qoşunlarının komandanı idi.
Əsasnamə və struktur dəyişikliyi ilə əlaqədar olaraq prezident Dövlət Sərhəd Xidmətinin rəisi postuna təyinat da edib. General-polkovnik Elçin Quliyev yenidən Dövlət Sərhəd Xidmətinin rəisi təyin olunub.
Dövlət başçısı hələ ki, Sərhəd Qoşunlarının komandanı postuna yeni təyinat etməyib.
Elçin Quliyev 22 sentyabr 1967-ci ildə Sumqayıtda anadan olub. Bakı Ali Birləşmiş Komandanlıq Məktəbini bitirib. 1988-1992-ci illərdə SSRİ Silahlı Qüvvələrində xidmət edib, 1992-ci ildən Xudat əlahiddə nəzarət buraxılış məntəqəsinin rəisi, 1996-cı ildən Xudat sərhəd dəstəsinin rəisi vəzifələrində çalışıb. 27 mart 2001-ci ildə milli təhlükəsizlik nazirinin müavini-Sərhəd Qoşunlarının komandanı təyin edilib. 31 iyul 2002-ci ildən Dövlət Sərhəd Xidmətinin rəisi-Sərhəd Qoşunlarının komandanı idi.
