Tramp 193 ölkədən üz döndərdi
ABŞ prezidenti Donald Tramp ölkəsinin Paris İqlim Sazişindən çıxdığını elan edib. İyunun 1-i Vaşinqtonda brifinq keçirən prezident qeyd edib ki, ABŞ yerli biznes, əməkçilər, vergi ödəyiciləri, ümumilikdə əhali üçün sərfəli, ədalətli şərtlər nəzərdə tutan ekoloji sazişə qoşulmağa hazırdır.
Donald Tramp Paris İqlim Sazişindəki öhdəliklərin ABŞ-ın iqtisadiyyatına mənfi təsir göstərə biləcəyini deyib. O, ölkəsinin 2025-ci ilədək 2,7 milyon iş yeri itirmək təhlükəsi ilə üz-üzə qaldığını vurğulayıb.
Novator.az bildirir ki, Paris İqlim Sazişi 2015-ci ilin dekabr ayında qəbul edilib. Sazişin məqsədi atmosferə karbon qazı tullantılarını azaltmaq və ekoloji baxımdan sabit gələcəyə yol açmaqdır. Öhdəliyə görə, qlobal temperatur artımını selsi şkalası üzrə 1,5 dərəcə səviyyəsində saxlamaq vəd edilir.
Ötən il noyabrın 4-də Paris Sazişi qüvvəyə minib. Sənədi 194 ölkə, o cümlədən Azərbaycan imzalayıb.
