Şamaxı yolunda vəziyyət necədir?
Yağış üzündən bağlanan Bakı-Şamaxı yolunda avtomobillərin hərəkəti bərpa olunub. “Azəravtoyol” ASC bildirir ki, iyunun 1-i axşam güclü yağış nəticəsində Bakı-Şamaxı avtomobil yolunun 80-ci kilometrlik ərazisinə, Ceyrankeçməz dərəsi adlanan hissəsinə dağlıq ərazilərdən gələn güclü sel suları özü ilə bərabər daş və palçıq qatı gətirərək yolun müvəqqəti bağlanmasına səbəb olub.
Əraziyə dərhal “Azəravtoyol” ASC-nin canlı qüvvəsi və ağır texnikası cəlb edilib, qısa müddət ərzində palçıq qatı yoldan təmizlənərək avtomobillərin hərəkəti bərpa olunub, Ceyrankeçməz çayının yatağı lildən təmizlənib və sel suları başqa əraziyə axıdılıb.
Təbii fəlakət zamanı ərazidə yolun altından keçən iki ədəd suötürücü borudan birində çökmə baş verib. Nəticədə yolun hərəkət hissəsində 5 metr enində 30-40 santimetr dərinlikdə çökmə ərazisi yaranıb, yolun kənarlarında olan torpaq qatı yuyulub. Ərazidə Ceyrankeçməz çayı üzərində yerləşən avtomobil körpüsünə ziyan dəyməsə də, sutənzimləyici qurğuların müəyyən hissəsi sel sularından ziyan görüb.
ASC-nin əməkdaşları ərazidə təbii fəlakətin fəsadlarının aradan qaldırılması istiqamətində işləri davam etdirir. Avtonəqliyyat vasitələrinin hərəkətində hər hansı bir problem müşahidə olunmur.
