Müharibə xəbərdarlığı
Mərkəzi qərargahı Brüsseldə olan Beynəlxalq Böhran Qrupu Qarabağ cəbhəsində yeni gərginlik xəbərdarlığı edib. Novator.az-ın məlumatına görə, təşkilat bildirir ki, 2016-cı ilin aprel ayındakı ağır döyüşlərdən bir il sonra Ermənistan və Azərbaycan yenə hərbi toqquşma astanasına gəlib.
Məruzəyə əsasən, 2016-cı ilin aprelində münaqişənin alovlanmasına gətirib çıxaran siyasi şərtlər və təhlükəsizlik durumu daha da ağırlaşdığı üçün yeni gərginlik yetişir: “2017-ci ilin yanvarında artilleriyanın və tank əleyhinə silahların tətbiqi ilə faciəvi insidentlər baş verib. May ayında cəbhə xəttinin bütün perimetri üzrə raket atəşləri qeydə alınıb. Bu gərginlik irimiqyaslı toqquşmalara keçə, mülki əhali arasında böyük itkilərə səbəb ola bilər”.
Beynəlxalq Böhran Qrupunun ekspertləri bildirir ki, Dağlıq Qarabağ danışıqları status qarşılığında ərazi variantına, o cümlədən təhlükəsizliyə beynəlxalq təminat mexanizminə əsaslanır: “Bu variant qarşılıqlı güzəştləri nəzərdə tutur, amma güzəştlər heç bir tərəfi qane etmir”.
1988-ci ildə Azərbaycana hərbi təcavüzə başlayan Ermənistan Dağlıq Qarabağ bölgəsini və daha 7 rayonu işğal edib. 1994-cü ildə elan olunan atəşkəsdən bəri ATƏT-in Minsk qrupunun vasitəçiliyi ilə aparılan sülh danışıqları heç bir nəticə vermir.
2016-cı il aprelin 2-dən 5-dək Azərbaycanın Silahlı Qüvvələri əks-həmlə əməliyyatları zamanı Ağdərə, Füzuli və Cəbrayıl rayonları ərazilərində bəzi məntəqələri işğaldan azad edib.
Hazırda sülh danışıqları Madrid prinsipləri əsasında aparılır. Minsk qrupu həmsədrlərinin – Rusiya, Fransa və ABŞ-ın 2007-ci ildə Madriddə irəli sürdüyü prinsiplər Dağlıq Qarabağ ətrafında olan rayonların mərhələlərlə Azərbaycanın nəzarətinə qaytarılması şərti ilə bölgənin yekun statusunun müəyyənləşməsini nəzərdə tutur.
