Kür və Araz çaylarında növbəti monitorinq keçirilib
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların transsərhəd qollarının çirklənmə vəziyyətini öyrənmək məqsədilə may ayında növbəti monitorinq keçirib.
Monitorinqin nəticələrinə görə, may ayının üçüncü ongünlüyündə Kür çayında suyun sərfi ayının ikinci ongünlüyünə nisbətən saniyədə 11 kubmetr artaraq saniyədə 523 kubmetr təşkil edib.
Monitorinq zamanı Gürcüstan və Ermənistan ərazilərindən təmizlənmədən birbaşa su obyektlərinə axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarının normadan dəfələrlə artıq olduğu müşahidə edilib.
Suyun tərkibindəki spesifik çirkləndiricilərdən fenollar yol verilən qatılıq həddini Şıxlı-2 məntəqəsində 3.7, Ağstafaçayda 3.3, Ağstafaçay su anbarında 2 dəfə keçib.
Fenollar Araz çayı üzrə Horadizdə 2, I Şahsevəndə 1.6, Bəhramtəpədə 2.3 dəfə yol verilən qatılıq həddindən artıq olub.
Mis birləşmələri isə Kür və Araz çayları üzrə bütün məntəqələrdə norma daxilində tərəddüd edib.
Suyun oksigen rejimi bütün məntəqələrdə sanitar norma daxilində dəyişib.
