Valeh Ələsgərova yeni missiya
Prezident İlham Əliyev azad iqtisadi zonalar yaradılması işini sürətləndirməyə sərəncam verib, işçi qrup yaradıb. Mayın 31-də imzalanmış sərəncama əsasən, işçi qrup üç ay müddətində azad iqtisadi zonaların yaradılması ilə bağlı hazırlanmış qanun layihəsinin ekspertizasını keçirib dövlətin mənafelərinin və investorların qanuni maraqlarının tarazlı şəkildə nəzərə alınmasını təmin edən sənədin yekun variantını hazırlamalı; azad iqtisadi zonaların inkişaf etdirilməsi məqsədi ilə bu sahədə təcrübəsi olan xarici investor (developer) şirkətləri ilə bağlanacaq müqavilələrin əsas şərtlərinə dair təkliflər verməlidir.
Milli Məclis sədrinin müavini Valeh Ələsgərovun sədrlik etdiyi işçi qrupun üzvləri bu şəxslərdir: İnam Kərimov (Vətəndaşlara Xidmət və Sosial İnnovasiyalar üzrə Dövlət Agentliyinin sədri), Emin Hüseynov (maliyyə nazirinin müavini), Niyazi Səfərov (iqtisadiyyat nazirinin müavini), Azər Cəfərov (ədliyyə nazirinin müavini), Sahib Ələkbərov (vergilər nazirinin müavini), İlqar Rəhimov (əmək və əhalinin sosial müdafiəsi nazirinin müavini), Şahin Bağırov (Dövlət Gömrük Komitəsi sədrinin müavini), Pərviz Musayev (Dövlət Miqrasiya Xidməti rəisinin müavini), Əfqan Nağıyev (Dövlət Sərhəd Xidmətinin Sahil Mühafizəsinin rəisi), Şahmar Mövsümov (Dövlət Neft Fondunun icraçı direktoru), Taleh Ziyadov (“Bakı Beynəlxalq Dəniz Ticarət Limanı” Qapalı Səhmdar Cəmiyyətinin baş direktoru).
Novator.az bildirir ki, işçi qrupun sədri Valeh Ələsgərov 1946-cı ildə Samux rayonunda anadan olub. Azərbaycan Dövlət Neft və Kimya İnstitutunu bitirib, mühəndisdir. 1970-1991-ci illərdə SSRİ Neft-Qaz Sənayesi Nazirliyinin “Permneft”, “Azneft” istehsalat birliklərində, 1992-2005-ci illərdə “Azərneft” Dövlət Konsernində, Dövlət Neft Şirkətində çalışıb. Əməkdar mühəndisdir.
102 saylı Samux-Şəmkir seçki dairəsindən deputat, Milli Məclisin təbii ehtiyatlar, energetika və ekologiya komitəsinin sədridir. 2005-ci ildən Milli Məclis sədrinin müavinidir.
