Uşaqların durumu: Azərbaycan 172 ölkə arasında 87-cidir
Mərkəzi qərargahı Londonda olan “Save the Children” beynəlxalq xeyriyyə təşkilatı uşaqların durumuna dair yeni hesabat açıqlayıb. Azadliq.org-un məlumatına görə, hesabatda qeyd olunur ki, dünyada 700 milyon uşaq uşaqlıq illərinin səadətindən məhrum edilib. Bunun əsas səbəbləri kimi xəstəliklər, zorakılıq və münaqişələr, uşaq əməyinin istismarı və azyaşlıların evləndirilməsi, təhsil və tibb xidmətinin olmaması göstərilir.
Hesabata əsasən, dünyada 268 milyon uşaq təhsildən məhrumdur, 168 milyon uşağın əməyi istismar edilir.
28 milyon uşağın münaqişələr üzündən qaçqın və ya köçkün vəziyyətinə düşdüyü bildirilir.
Qeyd olunur ki, 15-19 yaşları arasında 40 milyon qız uşağı nikahdadır, hər il 15-19 yaş arasında 16 milyon qız uşağı dünyaya uşaq gətirir.
Hər il 8 milyon uşağın vəfat etdiyi, 2015-ci ildə 75 min uşağın qətlə yetirildiyi vurğulanır.
“Save the Children” 172 ölkəni uşaqların rifahı, təminatı, hüquqları baxımından sıralayıb.
Cənubi Qafqaz ölkələri uşaqların qismən uşaqlıqdan məhrum olduğu ölkələr sırasındadır. Ermənistan 54-cü, Gürcüstan 85-ci, Azərbaycan 87-cidir.
Qlobal indeksə Norveç, Finlandiya və Sloveniya cədvələ başçılıq edir, son üç yeri Mali, Anqola, Niger tutur.
İyunun 1-i Uşaqların Beynəlxalq Müdafiə Günüdür.
