Nazirlik 142 və 190 mərkəzlərinə müraciətlərin statistikasını açıqlayıb
May ayında Əmək və Əhalinin Sosial Müdafiəsi Nazirliyinin 142 və 190 çağrı mərkəzlərinə 13505 müraciət daxil olub. Rəsmi hesabata görə, vətəndaşlar əsasən sosial təminat növləri, əmək qanunvericiliyi, sosial sığorta münasibətləri, məşğulluğun təminatı, tibbi-sosial ekspertiza və reabilitasiya, nazirliyin elektron xidmətlərindən istifadə ilə bağlı müraciət ediblər. Müraciətlərin 96,3 faizi bu məsələlərlə bağlı sorğu xarakteri daşıyıb. Digər müraciətlər isə nazirliyin müvafiq struktur bölmələrində araşdırılaraq tədbirlər görülüb.
190 mərkəzi vasitəsilə avtomatlaşdırılmış qaydada, yəni yalnız şəxsiyyət vəsiqəsinin nömrəsini təqdim etməklə real vaxt rejimində pensiya təyin edilməsi işləri də davam etdirilib. Ötən ay daxil olan müraciətlər əsasında aprel ayı ilə müqayisədə 5,6% çox olmaqla 95 avtomatlaşdırılmış pensiya təyinatı aparılıb.
Vətəndaşlar əlilliyin qiymətləndirilməsinin nəticəsi və ünvanlı dövlət sosial yardımının alınması üçün etdikləri müraciətlərə baxılmasının cari vəziyyəti barədə 142 mərkəzi vasitəsilə məlumat əldə etmək imkanlarından da yararlanıblar. Əlilliyinin və ya sağlamlıq imkanları məhdudluğunun qiymətləndirilməsi aparılan vətəndaş çağrı mərkəzinə zəng edərək 0 düyməsindən sonra 1 düyməsini yığmaqla həmin qiymətləndirmənin nəticəsi barədə məlumat əldə edir. Həmçinin vətəndaş çağrı mərkəzinə zəng etdikdən sonra 0 düyməsini və 2 düyməsini yığmaqla, şəxsiyyət vəsiqəsinin nömrəsini, sosial yardımın alınması üçün notarial qaydada təsdiq edilmiş ərizənin nömrəsinin sonuncu 4 rəqəmini daxil etməklə sosial yardım üçün etdiyi müraciətə baxılmasının cari vəziyyətini öyrənmək imkanına malikdir.
