Cəza qüvvədə qaldı, əlavə cərimə gəldi
İyunun 1-də Bakı Apellyasiya Məhkəməsi Beynəlxalq Bankın İdarə Heyətinin sabiq sədri Cahangir Hacıyev və digər 7 nəfərin şikayəti üzrə prosesi başa çatdırıb. Şikayət təmin olunmayıb, Bakı Ağır Cinayətlər Məhkəməsinin hökmü qüvvədə qalıb.
Yeganə yeniliyə görə, təqsirləndirilən Məmməd Cahangirovdan tutulmalı olan 1 milyon 200 min manat məbləğində mülki iddia ləğv edilib, həmin pulun Cahangir Hacıyevdən tutulması qərarı çıxarılıb.
Novator.az xatırladır ki, ötən il oktyabrın 14-də Bakı Ağır Cinayətlər Məhkəməsi Cahangir Hacıyevi 15 il müddətinə azadlıqdan məhrum edib. O, Beynəlxalq Bankın filial rəhbərləri olmuş Anar Sultanov, İlqar Abdullayev, Yusif Ələkbərov, Kənan Orucov, Məmməd Cahangirov, “İnter Security” MMC-nin sabiq direktoru İbrahim Hüseynov, Bakı Fındıq Emalı Zavodunun direktoru işləmiş Azad Cavadovla birgə mühakimə olunub.
Azad Cavadov 10 il 11 ay, Yusif Ələkbərov 8 il 6 ay, Kənan Orucov 7 il 6 ay, İbrahim Hüseynov 7 il 23 gün iş alıblar.
İlqar Abdullayev, Məmməd Cahangirov, Anar Sultanova şərti iş verilib.
İttihama əsasən, 2001-2015-ci illərdə Beynəlxalq Bankın İdarə Heyətinin sədri vəzifəsində işləmiş Cahangir Hacıyev digər şəxslərlə qabaqcadan əlbir olaraq mütəşəkkil qrup yaradıb və həmin qrupa rəhbərlik edib, qulluq mövqeyindən sui-istifadə edərək özünün, ailə üzvlərinin və digər şəxslərin adına kart hesabları açıb və həmin hesablara külli miqdarda pul vəsaitlərinin köçürülməsi barədə qanunsuz göstərişlər verib. Qeyd olunur ki, Cahangir Hacıyev və cinayətin digər iştirakçıları Müşahidə Şurasının qərarı olmadan Beynəlxalq Bankın filiallarında bir çox fiziki şəxsin adına 47 milyon 144 min manat kredit pullarını rəsmiləşdirərək mənimsəyiblər, Beynəlxalq Banka ümumilikdə 211 milyon 597 min manat məbləğində ziyan vurublar.
