Parlament bir nazir postunu azaltdı
Mayın 31-də Ermənistan parlamenti hökumətin strukturunda yeniliyə səs verib. Novator.az-ın məlumatına görə, Nazirlər Kabinetinin təqdim etdiyi layihə əsasında bir nazir postu ləğv edilir, Hökumət Aparatının rəhbərindən nazir statusu alınır.
Dəyişiklik Ermənistanın yeni konstitusiyasından irəli gəlir. Ali qanuna görə, baş nazirin müavinlərinin sayı 3-dən, nazirlərin sayı 18-dən çox ola bilməz.
Əvvəlki hökumətdə Hökumət Aparatının rəhbəri-nazir postunu tutmuş David Arutyunyan hazırda ədliyyə naziridir.
Hökuməti 105 nəfərlik yeni parlamentdə 58 mandatı olan hakim Respublika Partiyası qurur. Partiya parlamentdə 7 mandatla təmsil olunan Daşnaksütunla koalisiya razılaşması imzalayıb.
Yeni hökumətə də Karen Karapetyan baş nazirlik edir. Vaçe Qabrielyan baş nazirin müavini, beynəlxalq iqtisadi inteqrasiya və islahatlar naziri, Edvard Nalbandyan xarici işlər naziri, Vigen Sərkisyan müdafiə naziri, Qranuş Akopyan diaspor naziri, Suren Karayan iqtisadi inkişaf və investisiya naziri, Vardan Aramyan maliyyə naziri, Vahan Martirosyan nəqliyyat, rabitə və informasiya texnologiyaları naziri, Aşot Manukyan enerji infrastrukturu və təbii sərvətlər naziri, İqnati Arakelyan kənd təsərrüfatı naziri, David Tonoyan fövqəladə hallar naziri, Qraçya Rostomyan gənclər və idman naziri, Armen Əmiryan mədəniyyət naziri, Levon Altunyan səhiyyə naziri təyin olunub. Onlar əvvəlki hökumətdə də eyni vəzifələrdə çalışırdılar.
