12 ildə vergi orqanlarına 1258 nəfər gənc qəbul olunub
Vergilər Nazirliyi İnsan Resursları Departamentinin baş direktoru Faiq Şahbazovun müsahibəsini yayıb. Novator.az-ın məlumatına görə, baş direktor bildirir ki, 2005-ci ildən bəri dövlət vergi orqanlarına işə qəbul üzrə keçirilən 12 müsabiqə nəticəsində 1258 nəfər gənc vergi orqanlarında işlə təmin edilib və hazırda vergi orqanlarında xidmət keçən vəzifəli şəxslərin təxminən 47,3%-i yaşı 35-ə qədər olan gənclərdir: “Vergilər Nazirliyi gənc kadrların daha yuxarı vəzifələrə irəli çəkilməsi baxımından da fərqlənir. Hazırda rəhbər vəzifəli şəxslərin 32,2%-nin yaşı 35-dən aşağıdır”.
Faiq Şahbazov qeyd edib ki, 2017-ci ildə nazirlik işə qəbulla bağlı iki müsabiqə keçirib: “Müsabiqələrdə iştirak etmək üçün ümumilikdə 4976 nəfər vətəndaş müraciət edib. Test imtahanı mərhələsində 92 nəfər uğur qazanaraq müsahibə mərhələsinə buraxılıb, həmin mərhələdə isə 83 nəfər müvəffəqiyyət əldə edərək ehtiyat kadrlar siyahısına daxil edilib. Onlardan 58 nəfəri artıq analoji vakant vəzifələrə təyin olunub. Hazırda işə yeni qəbul edilənlər Vergilər Nazirliyinin Tədris Mərkəzində ilkin hazırlıq kursu keçirlər”.
İnsan Resursları Departamentinin baş direktoru bildirib ki, Vergilər Nazirliyi insan resurslarının idarə edilməsi sahəsində beynəlxalq təcrübədən yararlanmaq üçün Avropa İttifaqının dəstək layihəsini həyata keçirir və layihənin icrası müddətində nazirliyin 150 əməkdaşı xarici ekspertlərin cəlb olunduğu 35 işçi seminarda və təlimdə 30 mövzu üzrə ən son təcrübə ilə yaxından tanış olub.
Nazirlik rəsmisi qeyd edib ki, 2013-2020-ci illərdə vergi sisteminin inkişaf strategiyasından irəli gələrək insan kapitalı, onun idarəetmədə səmərəliliyinin artırılması, əməkdaşların tədris və təlim prosesinin təkmilləşdirilməsi strateji məqsədlər kimi müəyyən edilib: “Hazırda Şamaxı rayonunda Vergilər Nazirliyinin ən müasir auditoriyalarla, texniki avadanlıqlarla, dinləyicilərin və təlimçilərin qalması üçün yataqxanalarla təchiz edilmiş tədris mərkəzi fəaliyyət göstərir. 2015-ci ildən əməkdaşlar üçün onlayn rejimdə e-təlimlər təşkil edilir, bu da az xərc və vaxt sərf etməklə təlim proseslərinin intensivləşməsinə imkan verir. 2016-cı il ərzində 2876 nəfər e-təlimlərə cəlb edilib. Cari ilin yanvar-may aylarında isə 1063 nəfər əməkdaş onlayn təlimlərdə iştirak edib. 2016-cı ildən başlayaraq vergi orqanlarının fəaliyyət sahələri üzrə əməkdaşların bilik və bacarıqlarının sertifikatlaşdırılmasına başlanıb”.
