Ruhaniyə zəng
Prezident İlham Əliyev mayın 29-da iranlı həmkarı Həsən Ruhaniyə zəng edib. Telefon söhbətində dövlət başçısı Həsən Ruhaniyə yenidən prezident seçilməsi və Ramazan ayı ilə əlaqədar təbriklərini çatdırıb.
Prezidentin mətbuat xidmətinin məlumatına görə, söhbət zamanı ikitərəfli münasibətlərin bir çox aspektləri, o cümlədən regionda təhlükəsizlik məsələləri, Şimal-Cənub dəmir yolunun tikintisi, neft-qaz sahəsində əməkdaşlıq, sərmayə qoyuluşu, turizm, kənd təsərrüfatı sahələri ətrafında fikir mübadiləsi aparılıb.
Qeyd olunub ki, Azərbaycan-İran əlaqələri son dörd il ərzində ən yüksək səviyyəyə qalxıb, prezidentlər səviyyəsində bir çox qarşılıqlı səfərlər həyata keçirilib və bir sıra çox önəmli müqavilələr imzalanıb, razılaşmalar və imzalanmış sənədlər uğurla icra olunur.
Novator.az xatırladır ki, mayın 19-u İranda prezident seçkisi keçirilib. Dörd namizədin yarışdığı seçkidə Həsən Ruhani 57% səslə qələbə qazanaraq postunu əlində saxlayıb.
Həsən Ruhani 1948-ci ildə anadan olub. Qum dini dairəsində oxuyub, Tehran Universitetini bitirib, Böyük Britaniyanın Qlazqo Universitetində hüquq üzrə fəlsəfə doktoru elmi dərəcəsi alıb.
Həsən Ruhani 1980-2000-ci illərdə parlamentin üzvü olub, İran-İraq müharibəsi zamanı (1980-1988) Silahlı Qüvvələrdə rəhbər postlar tutub.
Uzun illər Ali Milli Təhlükəsizlik Şurasının rəhbəri vəzifəsində fəaliyyət göstərib, Üləma Məclisinin, Sistemin Məsləhətini Müəyyənləşdirən Qurumun üzvü olub.
2013-cü il iyunun 14-də prezident seçilib.
