Komitə sədrindən özəlləşdirmə rəqəmləri
Əmlak Məsələləri Dövlət Komitəsinin sədri Kərəm Həsənov mayın 30-u Bakıda keçirilmiş “İqtisadi islahatlar: əldə edilmiş nəticələr və tövsiyələr” mövzulu konfransda çıxış edib. Rəsmi məlumata əsasən, komitə sədri aparılan özəlləşdirmə çərçivəsində 250 mindən çox səhmdarın səhm sahibi olduğunu, 520 min nəfərdən çox insanı əhatə edən mülkiyyətçilər təbəqəsinin formalaşdığını qeyd edib.
Kərəm Həsənovun sözlərinə görə, yerli investorlar və xarici sərmayəçilərin iştirak etdikləri investisiya müsabiqələri vasitəsilə özəlləşdirmə nəticəsində ölkə iqtisadiyyatına təxminən 1 milyard manatdan artıq investisiya yatırılıb, özəlləşdirilən müəssisələrdə 320 mindən çox yeni iş yeri yaradılıb.
Hesabatda qeyd olunur ki, Privatization.az portalından istifadə edənlərin sayı 700 mini ötüb, yeni yanaşmalara uyğun olaraq 35 hərrac keçirilib, bu hərraclarda 1100-dən artıq dövlət əmlakı satışa çıxarılıb.
“Daşınmaz əmlakın kadastrı sisteminin inkişafı, torpaqdan istifadənin və onun mühafizəsinin səmərəliliyinin artırılmasına dair 2016-2020-ci illər üçün dövlət proqramı” əsasında 27 rayonda torpaqların elektron kadastr uçotu işlərinin həyata keçirilməsinə başlanıb və 12 rayon üzrə işlər başa çatdırılıb.
“İqtisadi islahatlar: əldə edilmiş nəticələr və tövsiyələr” konfransını İqtisadi İslahatların Təhlili və Kommunikasiya Mərkəzi ilə Azərbaycanda Amerika Ticarət Palatası birgə təşkil edib.
