Sərkisyan hökumət üzvlərini təyin edib
Ermənistan prezidenti Serj Sərkisyan yeni hökumətin bəzi üzvlərini təyin edib. Novator.az-ın məlumatına görə, Vaçe Qabrielyan yenidən baş nazirin müavini, beynəlxalq iqtisadi inteqrasiya və islahatlar naziri postuna təyinat alıb.
Edvard Nalbandyan xarici işlər naziri, Vigen Sərkisyan müdafiə naziri postunu qoruyub.
Qranuş Akopyan diaspor naziri, Suren Karayan iqtisadi inkişaf və investisiya naziri, Vardan Aramyan maliyyə naziri, Vahan Martirosyan nəqliyyat, rabitə və informasiya texnologiyaları naziri, Aşot Manukyan enerji infrastrukturu və təbii sərvətlər naziri, İqnati Arakelyan kənd təsərrüfatı naziri vəzifəsində saxlanıb.
Deputat seçildiyi üçün ədliyyə naziri postundan getmiş Arpine Ovannisyanın yerini isə David Arutyunyan tutub.
David Arutyunyan əvvəlki hökumətdə Hökumət Aparatının rəhbəri, nazir vəzifəsində idi. Nazirlər Kabinetinin parlamentə göndərdiyi yeni layihədə Hökumət Aparatının rəhbərindən nazir statusunun alınması təklif olunub. Dəyişiklik Ermənistanın yeni konstitusiyasından irəli gəlir. Ali qanuna görə, baş nazirin müavinlərinin sayı 3-dən, nazirlərin sayı 18-dən çox ola bilməz.
Mayın 18-də Karen Karapetyan yenidən baş nazir təyin edilib. Hökuməti 105 nəfərlik yeni parlamentdə 58 mandatı olan hakim Respublika Partiyası qurur. Partiya parlamentdə 7 mandatla təmsil olunan Daşnaksütunla koalisiya razılaşması imzalayıb.
