Vergi orqanlarında rəhbərlərin 32,2%-i gəncdir
2005-ci ildən bəri vergi orqanlarına işə qəbul üçün 12 müsabiqə keçirilib, imtahanlarda 14000 nəfərdən çox namizəd iştirak edib. Novator.az-ın məlumatına görə, bunu vergi orqanlarına işə qəbul edilmiş gənc kadrlarla görüşündə vergilər nazirinin birinci müavini Sahir Məmmədxanov deyib.
2005-ci ildən başlayaraq dövlət vergi orqanlarına işə qəbul test üsulu və müsabiqə yolu ilə keçirilir. Namizədlərin sənədlərinin qəbulu 2008-ci ildən internetlə aparılır.
2005-2017-ci illərdə 12 müsabiqə keçirilib, imtahanlarda 14000 nəfərdən çox namizəd iştirak edib. Müsabiqəni müvəffəqiyyətlə başa buran 1258 nəfər şəxs vergi orqanlarında işə götürülüb, bu da hazırda vergi orqanlarında xidmət edənlərin 53,5%-dir.
Sahir Məmmədxanovun sözlərinə görə, vergi orqanlarında xidmət keçən vəzifəli şəxslərin təxminən 47,3%-nin yaşı 35-dən azdır, rəhbər vəzifəli şəxslərə münasibətdə bu rəqəm 32,2%-dir.
Nazirin birinci müavini 2017-ci ildə dövlət vergi orqanlarına işə qəbulla bağlı müsabiqədə iştirak üçün 4976 nəfər şəxsin müraciət etdiyini, 92 nəfərin test mərhələsində, 83 nəfərin isə müsahibə mərhələsində uğur qazanaraq vergi xidməti orqanlarında işlə təmin olunmaq imkanı əldə etdiyini bildirib.
2017-ci ildə keçirilmiş son iki müsabiqədə daha çox regionlarda yaşayan gənclərin kadr potensialına daxil edilməsinə önəm verildiyini diqqətə çatdıran Sahir Məmmədxanov, vakant vəzifələrə təyin edilən 58 nəfərin əksəriyyətinin regionlardan olduğunu qeyd edib.
